2016-12-05
2016-cı il dekabrın 5-də Azərbaycan Respublikasının təşəbbüsü ilə YUNESKO ilə birgə “Hədəfimiz İrs: dialoq vasitəsilə irsin qorunması - yeni paradiqmalar axtarışında” adlı yüksək səviyyəli panel müzakirələri keçirilib.

YUNESKO-nun baş qərargahında “İrs naminə birlik” kampaniyası çərçivəsində Azərbaycan Respublikasının təşəbbüsü ilə YUNESKO ilə birgə Azərbaycanın YUNESKO yanında daimi nümayəndəsi Anar Kərimovun moderatorluğu ilə “Hədəfimiz İrs: dialoq vasitəsilə irsin qorunması - yeni paradiqmalar axtarışında” adlı yüksək səviyyəli panel müzakirələri keçirilib.

Panel müzakirələrində Azərbaycan mədəniyyət və turizm naziri Əbülfəs Qarayev, YUNESKO-nun baş direktoru İrina Bokova, BMT-nin Sivilizasiyalar Alyansı üzrə nümayəndəsi Nasir Əbdüləziz Əl-Nasir, Dünya Turizm Təşkilatının nümayəndəsi iştirak ediblər.

Konfransda mədəniyyət və turizm naziri Əbülfəs Qarayev çıxış edərək, 2017-ci il mayın 5-6-da Bakıda keçiriləcək Ümumdünya Mədəniyyətlərarası Dialoq Forumu barədə məlumat verib. Nazir bugünkü mürəkkəb dünyada mədəni irs abidələrinin müdafiəsi, mədəniyyətlərarası dialoqun əhəmiyyətindən söz açıb. O, ölkəmizdə müxtəlif dinlərin, mədəniyyətlərin, millətlərin, etnik qrupların nümayəndələrinin əsrlərdir sülh və əmin–amanlıq şəraitində bir ailə kimi yaşamasından danışıb. Ölkəmizin mədəniyyətlər və dinlərarası dialoq platformasına çevrildiyi vurğulanıb.

YUNESKO-nun baş direktoru İrina Bokova çıxışında Azərbaycan Hökumətinə Təşkilata göstərdiyi dəstəyə görə öz təşəkkürünü bildirib və qeyd edib ki, “Bakı prosesi” mədəniyyətlərarası dialoqu təşviq edir. Baş Direktor bildirib ki, mədəni irsin qorunması YUNEKSO-nun sülh və dialoq naminə qlobal strategiyasının hissəsidir.  

Digər natiqlər də mədəniyyətlərarası dialoqun əhəmiyyətinə toxunublar.

Müzakirələrdə bildirilib ki, hazırda beynəlxalq ictimaiyyət Yaxın Şərq və digər bölgələrdə mədəni və dini irs abidələrinin qəsdən və vəhşicəsinə məhv edilməsi ilə üzləşir. Bu dağıdıcı prosesin əsas səbəbi hərbi münaqişələr və terrorçu qrupların fəaliyyətidir. Bu problemlər qlobal sülh və dinlərarası harmoniyanın qorunub saxlanmasına ciddi təhdidlər yaradır.

YUNESKO-nun baş qərargahında keçirilən yüksək səviyyəli panel müzakirələrin əsas məqsədi hədəfə alınmış irs abidələrinin qorunması üçün profilaktik vasitə kimi dialoqun rolunu vurğulayaraq belə abidələrin qəsdən məhv edilməsinə qarşı mübarizədə yeni paradiqmalar tədqiq etməkdir. Panel iştirakçıları təmsil etdikləri təşkilatların profilinə uyğun bu mövzuları təhlil ediblər.

Yüksək səviyyəli panel müzakirələrində Azərbaycan Respublikasının maliyyə dəstəyi ilə ingilis və fransız dillərində hazırlanmış “Mədəniyyət mülkiyyətinin qorunması haqqında hərbi bələdçi”nin təqdimatı olub. Sözügedən hərbi bələdçi hərbi münaqişələr zamanı mədəni irs abidələrinin qorunması baxımından hərbiçilər üçün böyük əhəmiyyət kəsb edir.

növbəti xəbər əvvəlki xəbər

bakushop